Алғашқы алты геймде қос қарсылас өздеріне сенімді болды. Алайда жетінші геймде қазақстандық теннисші брейк-пойнтты сәтті пайдаланып, есепті 4:3-ке жеткізді. Бұдан кейін ол тағы екі геймді қатарынан жеңіп, алғашқы сетте басымдықты нығайтты. Осылайша, партия небәрі 29 минутта 6:3 есебімен аяқталды.
Екінші сетте 21 жастағы канадалық теннисші ойын ырғағына біртіндеп бейімделді. Үшінші геймде тартыс күшейіп, есеп бірнеше рет теңесті. Дегенмен, Юлия Путинцева 5:1 есебімен алға шыққан сәтте матчты доп беру кезінде аяқтай алмай қалды.
Осыдан кейін ойын барысы өзгерді. Канадалық қарсылас қатарынан төрт геймді жеңіп, есепті 5:5-ке дейін теңестірді. Ал бірнеше матчбол мүмкіндігін пайдалана алмаған Юлияға кездесуді жеңіспен аяқтау үшін бар күшін салуға тура келді.
Кездесу Қазақстан құрамасы көшбасшысының пайдасына 6:3, 7:5 есебімен аяқталды. Ал жалпы есепте Қазақстан құрамасы 1:0 есебімен алға шықты.
Келесі кезекте кортқа 19 жастағы Соня Жиенбаева (1023) мен канадалық Бьянка Андрееску (130) шығады.
Айта кетейік, Қазақстан – Канада кездесуінің жеңімпазы 22–27 қыркүйек аралығында Қытайда өтетін Билли Джин Кинг кубогының финалдық кезеңіне жолдама алады.
Еске сала кетейік, теннисші Зарина Дияс кәсіби мансабын аяқтады.