АСТАНА. ҚазАқпарат – Футболдан бірінші лига командалары арасындағы Қазақстан чемпионатының 15-турында Ақтөбеде «Ақтөбе-Жас» командасы Оралдың «Ақжайығын» қабылдады, деп хабарлайды ҚазАқпарат тілшісі.
Премьер-лигаға оралудан әлі де үміт үзе қоймаған оралдықтар үшін бұл матч маңызды еді.
Бірінші таймда 37-минутта «Ақжайықтан» Ақтау футболының түлегі Бақдәулет Көңілімқос есеп ашты – 1:0.
Екінші кезеңде қос клуб қанша тырысқанымен, есеп өзгерген жоқ.
Осылайша, ақтөбелік маман, бұрын «Ақтөбе-Жасты» баптаған Игорь Прохницкий жаттықтыратын «Ақжайық» 28 ұпаймен турнир кестесінде бұрынғыша үздік үштікті түйіндеп тұр.
Оралдықтар келесі турда 20 шілде күні өз алаңында «Екібастұзды» қабылдайды.
Еске сала кетейік, бұдан бұрын Қазақстан құрамасының ойыншысы «Тобылдан» «Астанаға» ауысқанын жазған едік.
Сондай-ақ бірінші лигада «Түркістан» үздіктерге жақындай түсті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).