ОРАЛ. ҚазАқпарат - Футболдан бірінші лига командалары арасында ел чемпионатының кезекті турында Оралдың «Ақжайығы» өз алаңында астаналық «Жеңісті» қабылдады, деп хабарлайды ҚазАқпарат тілшісі.
Қос команда турнир кестесінде құйрық тістесіп, үшінші-төртінші орында келе жатқандықтан, бұл ойын маңызды еді.
Матч басталысымен-ақ 2-минутта қонақтар сапындағы гамбиялық шабуылшы Па Омар Джоуб есеп ашты. Дегенмен, 31-минутта «Ақжайықтан» украиналық легионер Микола Агапов таразы басын теңестірді - 1:1.
Екінші кезеңде есеп өзгерген жоқ.
Осылайша, «Жеңіс» бұрынғыша үздік үштікті түйіндесе, оралдықтар төртінші орында қалды.
«Ақжайық» келесі кездесуін Шымкентте 10 тамыз күні «Қыранмен» өткізеді.
Еске сала кетейік, бұдан бұрын «Ақжайықтың» «Хан Тәңірі» командасымен тең ойнағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).