ОРАЛ. ҚазАқпарат – Футболдан бірінші лига командалары арасында Қазақстан чемпионатының 16-турында Оралдың «Ақжайығы» өз алаңында «Екібастұзды» қабылдады, деп хабарлайды ҚазАқпарат тілшісі.
Бірінші айналымды үшінші орынмен тәмамдаған алаң иелері «Екібастұзбен» ойында үш ұпай олжалауды көздейтіні анық еді.
Өткен турда Ақтөбеде «Ақжайық» сапындағы алғашқы голын соққан Ақтау футбол мектебінің түлегі Бақдәулет Көңілімқос бұл жолы да мергендік танытты. Тіпті қарсыластың қақпасына бір емес, үш доп енгізіп, хет-триктің авторы атанды. 72-минутта украиналық Микола Агапов 11 метрлік нүктеден мүлт кетпей, есепті 4:0-ге жеткізді. 92-минутта қонақтардан Максим Скорых бір ғана голмен жауап қайырды. Қорытынды есеп – 4:1, «Ақжайықтың» пайдасында.
Осылайша, 31 ұпай жинаған Игорь Прохницкийдің шәкірттері бұрынғысынша турнир кестесінде 3-орында келеді.
Оралдықтар келесі кездесуін 28 шілде күні сырт алаңда «Хан-Тәңірі» командасымен өткізеді.
Еске сала кетейік, бұдан бұрын бірінші лигада «Ақжайықтың»» Ақтөбеде жергілікті команданы жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).