ОРАЛ. ҚазАқпарат – Футболдан бірінші лига командалары арасында ел чемпионатының 22-турында Оралдың «Ақжайығы» өз алаңында Алматының «Қайрат-Жастар» командасын қабылдады, деп хабарлайды ҚазАқпарат тілшісі.
Өткен турда сырт алаңда «Арыстан» 2:0 есебімен басым түскен оралдықтар үшін бұл кездесу де маңызды еді.
Бірінші таймда 36-минутта алматылықтардан Диас Күшкімбаев есеп ашты.
Екінші кезеңде «Ақжайықтың» сұрмергені, украиналық Микола Агапов 53-інші және 93-минутта екі голдың авторы атанып, командасына жеңіс әперді.
Бұл ойыннан кейін 39 ұпай жинаған оралдықтар турнир кестесінде бұрынғысынша төртінші орында келеді.
Еске сала кетейік, бұдан бұрын Криштиану Роналдудың ұлттық чемпионатта гол соғу жөнінен әлемдік рекорд орнатқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).