ОРАЛ. ҚазАқпарат – Бірінші лига командалары арасында ел чемпионатының 3-турында Оралдың «Ақжайығы» өз алаңында Алматының «Хан Тәңірі» командасын қабылдады, деп хабарлайды ҚазАқпарат тілшісі.
Бірінші таймда қонақтардан 13-минутта Марлен Айманов есеп ашса, алаң иелерінен 20 минуттан кейін Роман Чирков таразы басын теңестірді.
Екінші кезеңде 49-минутта «Ақжайықтан» Завен Бадоян есепті 2:1-ге жеткізді. 87-минутта Р.Чирков матчтың нүктесін қойды.
Бүгін сондай-ақ Семейдің «Елімай» командасы сырт алаңда «Жас Қыранды» 2:0 есебімен тізе бүктірді. Бұл ойында Алтынбек Сапаров пен Максим Житнев мергендік танытты.
Үш турдан кейін 7 ұпай жинаған «Елімай», «Қайрат-Жастар» және «Ақжайық» командалары алғашқы үштікте келеді. Оралдықтар 27 сәуірде Астананың «Жеңісін» қабылдайды. Содан кейін 30 сәуірде Қазақстан кубогінің плей-офф бәсекесінде Алматының «Қайратымен» қарымта кездесуін өткізеді.
Еске сала кетейік, бұдан бұрын бірінші лигада «Ақжайықтың» алғашқы жеңісіне қол жеткізгенін жазған едік.
Суреттерді түсірген: Түгелбай Бисен.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).