«Биыл Елбасының тапсырмасымен Көксарай су реттегішінің бірінші кезегі іске қосылды және бұл уақытылы болды. Себебі, Сырдарияның өткізу көлемі өте үлкен болды, ал Шардара су қоймасы толығымен дерлік толған еді. Көксарай су реттегішіне 910 миллион текше метр су қабылданғандықтан, біз Қызылорда облысында қаупті жағдайды болдырғанымыз жоқ. Бұл уақытта өзен жартылай мұз астында болған еді. Сондықтан, жаңа су реттегіш болмаған жағдайда, 57 елді мекен тасқынды аумақта қалар еді», - деді В.Петров.
Кеңес барысында Ө.Шөкеев, Көксарайға жиналған 910 млн. текше метр суды тиімді пайдалануды тапсырды. «Біз бұл суды мақсатсыз ағызып жіберу үшін жинап жатқанымыз жоқ. Оны Қызылорда облысындағы ауыл шаруашылық және суару жұмыстарына жұмсау қажет», - деді ол.
Сондай-ақ Ө.Шөкеев, Көксарайдың өткізу мүмкіндігін реттеуді тапсырып, биыл Қызылорданы сумен 100 пайызға қамтамасыз етуді тапсырды.
Өз кезегінде В.Петров, жаңа нысанға жиналған суды пайдалану үшін Шардара су қоймасы уақытша жабылатынын айтты. «Өңірде судың қажетті мөлшері - 5 миллиард 300 миллион текше метр су жиналды. Менің ойымша, биыл Шардараның төменгі бөлігінде Оңтүстік Қазақстан мен Қызылорда облыстарында сумен проблема болмайды», - деді.