Қорғау тарапының айтуынша, алқабилердің бірі ҚР Қылмыстық іс жүргізу кодексінің нормаларын бұзған, себебі ол әлеуметтік желі пайдаланушыларымен байланысып, сот талқылауы туралы айтқан, іске қатысушылардың арналарына жазылған.
«Бұл № 4 алқаби. Ол өз аккаунтынан алқаби ретінде таңдалғаны туралы пікір қалдырған және іріктеудің әділ және ашық өткенін айтқан. Бұл пікірдің астында бірнеше желі қолданушы оған қысым жасай бастаған. Сондай-ақ, алқаби мәскеулік сарапшылардың қорытындысын сынаған сарапшы Тахир Халимназаровтың аккаунтына жазылған», - деді Е.Ғазымжанов.
Оның айтуынша, алқаби жәбірленуші Айтбек Амангелдінің де аккаунтына жазылған. Онда А.Амангелді істің мән-жайы туралы ақпаратты өз пайымдауымен ұсынып отырған.
Адвокат осы бұзушылықты Бишімбаевтың үкімін өзгертуге негіз бола алатынын айтады.