Әкімнің сөзінше, Алмалы ауданында жалпы ұзындығы 173,3 шақырым болатын 110 көше бар.
«Биыл 12 көшеде 15 шақырым жол төсемін жаңартамыз. Варламов көшесінің бойында жұмыстар жүргізілуде, сонымен қатар Райымбек – Розыбакиев жол айрығында жөндеу жұмыстары жүргізілуде. 6 шақырымнан астам тротуар желісін салуды жоспарлап отырмыз. 33,9 шақырым арық желісін реконструкциялауды бастаймыз», - деді Серік Құсайынов.
Аудан әкімі көшелердегі жол төсемін жаңарту тұрғындар үшін маңызды екенін айтты.
«Биыл 4 қиылысқа бағдаршам қоямыз және 9 жаяу жүргіншілер өткеліне реттелетін бағдаршам орнатамыз», - деді ол.
Серік Құсайынов соңғы жылдары Алмалы ауданындағы аулалар мен көшелерді жарықтандыру бойынша көптеген жұмыстар атқарылғанын жеткізді.
«Қазіргі уақытта 84 жарықтандырылмаған және ішінара жарықтандырылған учаскелерге ағымдағы жөндеу жұмыстары жүргізілуде, 1 тоқсанда 143 көше шамдары орнатылды. 12 монументалды ескерткішті жарықтандыру жұмыстары жүргізілді», - деді Алмалы ауданының әкімі Серік Құсайынов.
Сонымен қатар, 7 көше бойындағы ескі көше жарығы энергия үнемдейтін LED-шамдарға ауыстырылады; Желтоқсан, Наурызбай батыр, Розыбақиев, Шевченко, Абай (Есентай өзенінен аудан шекарасына дейін), А.Байтұрсынов, Манас.