Биыл қармақшылықтардың қарқыны жақсы - Қызылорда облысы

ҚЫЗЫЛОРДА. Тамыздың 24-і. ҚазАқпарат /Жаңагүл Сердалы/ - Үстіміздегі жылы Қармақшы ауданының шаруашылық құрылымдары 20230 гектар жерге дәнді дақылдар екті. Сыр салысы саналатын күріш тұқымын орналастыру межесі алдын ала жасалған индикативтік жоспар бойынша 10070 гектарға белгіленсе, қажетті суға қол жеткізудің мүмкіндігі жасалуына орай бұл болжамның ауқымы қосымша 1695 гектарға ұлғайтылды. Қазіргі кезде қармақшылық диқандар 45 гектар жаздық бидай, 1095 гектар картоп пен 550 гектар мақсары және 530 гектар көкөніспен қоса 650 гектар бақша және 5560 гектарды құрайтын жоңышқалықты күтіп, баптауда.

Қысқы маусымға мал азығының мол қорын әзірлеу науқаны барысында қарқынды қимыл танытқан жергілікті жұртшылықтың ұйымшыл­дығының нәтижесінде әр гектардан 15 центнерден өнім алынып, екі орымда 7 мың тоннадан астам жем-шөп жиналды.

Алдашбай ауылындағы ахун аттас серіктестік егін салып, мал бағуға қолайлы тың топырақтың төсіне былтыр 160 гектар күріш орналастырып, 8800 центнер өнімді қамбаға құйған-ды. Ал биылғы межесі тіптен биік. Себебі, олар тұрғындардың ұсынысымен астық алқабының көлемін қосымша жүз гектарға ұлғайтып, қауын-қарбыз бен картоп-сәбіз егетін бақшалық жердің де ауқымын арттырды.

- Елбасының бастамасымен кешендік құры­лысы қарқынды қолға алынған «Көксарай» су реттегішінің алғашқы кезеңінің көктемде пайда­лан­уға берілгені сырбойылық диқандарды тіршілік нәрінің тапшылығынан құтқарды, - дейді ұйымшыл ұжымның төрағасы Ерлан Қиясов. - Биыл тыңайтқыш пен егілген егіс және жанар-жағар­майға жұмсаған жалпы шығынымыздың өтемі мен басқа да материалдық құндылықтардың бағамын арзандатудың ақысы 4,5 млн. теңгені құрады. Осы төлем есеп-шотқа дер кезінде түспесе шаруашылықтың басқа мұқтаждықтарын реттеу оңайға соқпас еді.

Сәндібек Оразов басқаратын бақшашылар бригадасы аудандағы әріптестерінің алғашқы қатарында өздерінен ауысқан өнімдерін аудан орталығындағы базарға шығарып, тұтынушы­лар­дың сұранысына сай арзан бағамен сатты. Ал­дағы уақытта көршілес ауылдар мен шалғай ме­кен­дерде ұйымдастырылатын жәрмеңкеге қатысып, қарапайым халықтың алғысына бөленбек.

Жоңышқа ору науқанында 100 гектардан екі жүз тоннаға жуық мал азығын дайындап, төрт түлік өсірген тұрғындарға таратқан шаруашылық басшылығының ендігі мақсаты мал шаруашы­лығының дамуына үлес қосу. Тұрмысының түрленуі тынымсыз тірлікке тікелей байланысты екендігін түсінген Алдашбай ахун ауылының жұртшылығы атқарушы биліктің тарапынан атқарылған ауқым­ды істердің ұзақ мерзімді бағдарламаларға сай әлі де жарасымды жалғасын табарына нық сенімді. Құтты қоныста қабырғасы қаланған 200 орындықты мектеп ғимаратының құрылысы аяқ­талып, өскелең ұрпақ заманауи құрылғылармен жабдықталған кең де жарық сынып бөлмелерінде білім алуда. Ұзындығы алты шақырымға жетерлік ауызсу жүйесі пайдалануға берілді. Көшелер де жөнделіп, ауылдың іргесімен өтетін автокөлік жолына асфальт жамылғысы төселуде. Жарық­тандыру мақсатында тартылған электр желілері самаладай шамдарға жан бітіретін болады.