Бұл туралы бүгін селекторлық форматтағы Үкімет отырысында Ауыл шаруашылығы министрі Ақылбек Күрішбаев мәлім етті.
«Облыстық әкімдіктердің мәліметтеріне сәйкес биылғы жылы республика бойынша жалпы егістік алқап 21,3 млн. гектарды құрайды. Оның 16,5 млн. гектары - дәнді, 1,7 млн. гектары - майлы дақылдар. Бұл ретте дәнді жемдік және дәнді бұршақты дақылдардың егістік алқабы 94 мың гектарға артпақ. Сонымен қатар жем-шөп дақылдарының көлемі 95 мың гектарға, көкөніс алқабы 2,5 мың гектарға және қант қызылшасының көлемі 1,7 гектарға ұлғаймақ»,-деді министр.
Оның атап өтуінше, жем-шөп дақылдары егістік алқабының ұлғаюы мал шаруашылығы саласына байланысты орын алып отыр. Сондай-ақ министрдің атап өтуінше, ағымдағы жылы ылғал сақтайтын технологияларды қолдану алқаптарының жалпы көлемі 11,9 млн. гектарға жетеді. Ол барлық егістік алқаптарының 68 пайызын құрайды деп жоспарлануда. Бұл былтырғы деңгейден 650 мың гектарға немесе 6 пайызға артық.