Биылғы жылдың 11 айында 3 судья қылмыстық жауапқа тартылды
15:06, 24 Желтоқсан 2011
АСТАНА. 24 желтоқсан. ҚазАқпарат /Айдар Оспаналиев/ - Биылғы жылдың 11 айында 3 судья қылмыстық жауапқа тартылған. Бұл мәліметтермен бүгін республика соттарының 2011 жылғы жұмысының қорытындылары жөніндегі кеңейтілген кеңес барысында Жоғарғы сот төрағасы Бектас Бекназаров таныстырды.
Оның деректерінше, жыл басынан бері еліміз бойынша 120 судья әкімшілік жауапқа тартылған. Олардың 89,7 пайызы сот істерін қарау кезінде жіберген кемшіліктері үшін жауапқа тартылды. Әкімшілік жауапқа ең көп тартылған судьялар Қарағандыда - 14, Алматыда - 13, Алматы және Қостанай облыстарында - 11 дерек орын алды. «Осы орайда айта кетер мәселе еңбек тәртібі мен судьялардың этикалық нормалары ерекше және тұрақты назарда болуы керек», - деп атап көрсетті Б.Бекназаров.