ОРАЛ. 2 маусым. ҚазАқпарат - 1 маусым күні облыс әкімі Нұрлан Ноғаев Батыс Қазақстан облысына жұмыс сапарымен келген ҚР Парламенті Сенатының депутаттары Ерболат Мұқаев, Ғарифолла Есім және Сәрсенбай Еңсегеновтерді қабылдады.
Кездесуде өңір басшысы сенаторларды облыста қолға алынған және жүзеге асырылған жобалармен, мемлекеттік бағдарламалардың орындалу барысымен таныстырды. Әсіресе, индустриялық-инновациялық бағдарламаға, әлеуметтік жаңғырту, аймақты дамыту мәселелеріне айрықша мән берілді.
Кездесу соңында Сенат депутаты Ғарифолла Есім айтқанындай, өңірлерге мұндай жұмыс сапарлары өте маңызды. Ол алдымен жергілікті жердегі түйткілді тұстарды көзбен көріп, тамыршыдай тап басуға мүмкіндік береді. Батыс Қазақстан облысы елді мекендерінің 80 пайыздан астамының газдандырылуын сенатор өте жақсы көрсеткіш деп бағалады. Сонымен қатар алдағы уақытта мұндағы сумен қамту, жол салу, экологияны жақсарту мәселелеріне заң шығарушы орган тарапынан қолдау болатындығын жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).