БҚО әкімдігінің бұрынғы қызметкері қамауға алынды

ОРАЛ. KAZINFORM – Орал қаласының мамандандырылған әкімшілік сотында БҚО әкімі аппараты ішкі аудит қызметінің бұрынғы жетекшісі Ербол Найзабековке қатысты іс қаралды.

Сот талқысында мәлім болғанындай, 1 қазан күні Volkswagen Tiguan автокөлігінің жүргізушісі бағдаршамда тоқтап тұрған Mercedes көлігін соққан. Салдарынан Mercedes «ВАЗ» және Skoda Rapid автокөліктерін түйген.

Volkswagen Tiguan автокөлігінің рулінде болған Ербол Найзабеков медициналық куәландыру нәтижесі бойынша орта дәрежелі мас күйінде болған. 

Судья Әсел Ғайнединованың айтуынша, сот істі қарау мерзімі өтпеген деп есептейді. 

- Өйткені соңғы сараптама нәтижелері биылғы 24 қаңтарда алынған. Сондай-ақ сарапшы Ербол Найзабековтың мас күйінде болғандығын көрсеткен. Оның кінәсі дәлелденді, - деді Әсел Ғайнединова.

Ербол Найзабеков Әкімшілік құқықбұзушылық кодексі 608-бабы 3-бөлігіне сәйкес айыпты деп танылып, ол 20 күнге әкімшілік қамаққа алынды. Сонымен қатар 7 жылға көлік басқару құқығынан айырылды. 

Әсел Ғайнединова жәбірленуші Ақбота Кеңестің бастапқыда хаттамада көрсетілмегенімен, істі зерттеу барысында оның Mercedes автокөлігінде отырғаны анықталғанын жеткізді. 

- Сараптамаға сәйкес жәбірленушінің денсаулығына жеңіл дәрежеде зиян келтірілген. Егер емделу барысында тағы да сараптамадан өтіп, орта дәрежеде зиян келтірілген деп танылса, онда жаңадан ашылған мән-жай бойынша қылмыстық іс қозғалуы мүмкін, - деді судья. 

Сот қаулысы күшіне енген жоқ. 

- Енді азаматтық талап арыз бергіміз келеді. Қол қысқа болғанымен, адвокат жалдайтын шығармыз. Қызым екі күннің бірінде ауырып қалады. Оның аяғынан тік тұрмайынша тоқтамаймын. Шауып жүрген қызым осындай халге түсіп қалды, - деді Kazinform тілшісіне Ақботаның анасы, Атырау облысы Индер ауданында тұратын Гүлжан Жарқынбаева.

Еске сала кетейік, бұдан бұрын жол-көлік оқиғасын жасаған БҚО әкімдігінің қызметкері жұмысынан босатылғанын жазған едік.