ОРАЛ. ҚазАқпарат – Батыс Қазақстан облысында 10 тонна тоқыма бұйымдары тиелген жүк көлігі жанып кетті, деп хабарлайды ҚазАқпарат тілшісі.
БҚО ТЖ департаментінің баспасөз қызметінен мәлім еткеніндей, оқиға 17 маусым күні кешкісін Теректі ауданы аумағында болды.
«Сағат 19.27-де Самара-Шымкент жолында 45 жастағы шымкенттік жүргізуші айдап келе жатқан Scania жүк көлігі отқа оранды. Жүк көлігінен шыққан өрт құрғақ шөпке жайылып, аумағы 200 шаршы метрді құрады. «Тілсіз жау» сағат 21.15-те оқшауланып, 23.30-та толықтай ауыздықталды. Зардап шеккендер жоқ. Аталған жүк көлігі Қырғызстаннан Мәскеуге шұлық, мата апара жатқан. Жыл басынан бері өңірде 8 жүк көлігі өртенді», деп хабарлады ведомстводан.
Еске сала кетейік, бұдан бұрын Оралда балалар отырған автобустың өртенуіне байланысты жүргізуші мен лагерь басшысы жауапқа тартылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).