ОРАЛ. KAZINFORM — БҚО бойынша экономикалық тергеп-тексеру департаменті шетел валютасын ірі мөлшерде өткізу дерегі бойынша айыпталған И. деген азаматқа қатысты істі сотқа жолдады.
Департаменттің баспасөз қызметінен мәлім еткеніндей, аталған азамат 2024 жылдың күзінде 25 мың АҚШ доллары және 10 мың еуро көлемінде жалған шетел валютасын одан әрі пайдалану мақсатында сатып алған.
Осылайша, 30 қыркүйек пен 3 қазан аралығында жалған валютаны теңгеге айырбастап, «Loto Club» қосымшасындағы шоттарды толықтырған.
Бұдан кейін лотереяға бәс тігу нәтижесінде ұтысты Қазақстан валютасымен, яғни теңгемен алған.
Сөйтіп ол алаяқтық әрекеттер нәтижесінде 14 млн теңгені заңсыз иемденген.
— Айыпталушының бұл әрекеттері ҚК 231-бабы (жалған шетел валютасын өткізу) және 190-бабы (алаяқтық) бойынша сараланып, сотқа жолданды. Қылмыстық іс Орал қалалық сотында қаралып, үкім шығарылатын болады, — деп хабарлады ведомстводан.
Еске сала кетейік, бұдан бұрын Оралда 33 жастағы тұрғынның адамдарды қорқытып, ақша бопсалаумен айналысқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).