ОРАЛ. ҚазАқпарат – Батыс Қазақстан облысында қора-қопсының өртенуі жиілеп отыр, деп хабарлайды ҚазАқпарат тілшісі.
БҚО Төтенше жағдайлар департаментінің бас маманы Нұралы Мусиевтің айтуынша, 11 мамыр күні сағат 02.00-де Ақжайық ауданы Чапаев ауылында шаруашылық құрылысы өртенді.
50 шаршы метр аумақты шарпыған «тілсіз жау» өрт сөндірушілердің (4 адам) күшімен сағат 03.48-де ауыздықталды.
Қазіргі кезде келтірілген шығын, өрттің шығу себебі анықталу үстінде.
Облыс аумағында жыл басынан бері 162 өрт тіркелсе, соның 70-і осы шаруашылық құрылыстарының үлесіне тиеді.
«Өрттің, соның ішінде қора-қопсының жалынға шарпылуының көбеюі негізінен адамдардың өрт қауіпсіздігі ережелерін сақтамауына байланысты. Сонымен қатар қасақана от қойылуы да ықтимал. Мұның нақты себептерін полиция қызметкерлері анықтайды», - деді ҚазАқпарат тілшісіне Н.Мусиев.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).