ОРАЛ. ҚазАқпарат – Батыс Қазақстан облысында су басқан аймақтан 2 жүкті әйел тікұшақпен Оралға жеткізілді, деп хабарлайды ҚазАқпарат тілшісі.
БҚО Төтенше жағдайлар департаментінің жедел штабынан мәлім еткеніндей, оқиға Жәнібек ауданы Жақсыбай ауылында болды.
Өңірге көмекке келген Атырау облысы ТЖ департаментінің күшімен Жақсыбай ауылында тұрғын үйлерден су сорылуда.
Ауылда барлығы 97 үй суға кетсе, қазір соның 57-сінде жұмыстар жүргізілуде.
«ҚазАвиаҚұтқару» тікұшағымен Жақсыбай ауылынан 37 және 25 жастағы жүкті екі келіншек Оралға жеткізіліп, туыстарына тапсырылды.
ТЖ департаменті мәліметі бойынша өңірде осы кезге дейін 140 үй суға кетті.
Қазіргі кезде облыста су тасқынына қарсы күрес жалғасуда.
Еске сала кетейік, бұдан бұрын БҚО-ның тағы бір ауданында төтенше жағдай жарияланғанын, 170-тен астам тұрғын үйді су басқанын жазған болатынбыз.
Сондай-ақ тасқын су шайып кеткен соң бірнеше көлік жолы жабылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).