ОРАЛ. ҚазАқпарат - Мемлекет басшысының шешімімен өткен жылы Батыс Қазақстан облысына жұмыспен қамту мақсатында қосымша 5 млрд. теңге бөлінді, деп хабарлайды «ҚазАқпарат» ХАА тілшісі.
Облыс әкімі Алтай Көлгіновтің айтуынша, соның нәтижесінде өңірде 200-ден астам әлеуметтік нысандар мен инфрақұрылымдар жаңартылды. Мысалы, ірге көтергеніне қырық жыл болған Ақжайық аудандық ауруханасы 370 млн. теңгеге күрделі жөндеуден өткізілді. Сол секілді Теректі ауданы орталығы Федоров ауылында салынғанына жарты ғасыр болған орта мектеп ғимараты 165 млн. теңгеге қайта түледі. Мұнда қазір 400 шәкірт білім алуда.
Барлық бағыттар бойынша облыста 22 мыңнан астам адам жұмыспен қамтылса, соның ішінде 6 мыңнан астамы тұрақты еңбек орнын тапты.
«Мұның бәрі - Елбасы ұсынған «100 нақты қадам» Ұлт жоспарының, «Нұрлы жол», «Бизнестің жол картасы - 2020», «Жұмыспен қамтудың жол картасы - 2020», өңірлерді дамыту және басқа бағдарламалардың жемісі. Бұл бағыттағы жұмыстар биыл да жалғасатын болады», деді өңір басшысы.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).