ОРАЛ. ҚазАқпарат – Батыс Қазақстан облысында 22 мың данаға жуық медициналық масканы алып кетіп бара жатқан ресейлік азамат ұсталды, деп хабарлайды ҚазАқпарат тілшісі.
ҚР ҰҚК Шекара қызметі 2029-әскери бөлімі командирінің орынбасары Асқар Қазбековтің мәлімдеуінше, оқиға 24 наурыз күні сағат 19.00-де «Сырым» өткізу бекетінде болған.
Шекарашылар Орал-Самара бағытында ресейлік азамат айдап бара жатқан автокөлікті қараған кезде 9 жол сөмкесі табылды.
Ілеспе құжатында «Тоқыма, 200 кг» деп көрсетілгенімен, ол 21 875 дана медициналық маска болып шықты. Тауардың құны шамамен – 3 млн теңге.
Жүк Орал қаласындағы «KazExpress» компаниясынан жөнелтілген.
Автокөлікті БҚО бойынша экономикалық тергеу департаментіне беру көзделуде.
Еске сала кетейік, бұдан бұрын БҚО-да 26 тонна медицина қолғабын Мәскеуге апара жатқан жүк көлігі ұсталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).