БҚО-да 239 түлек «Алтын белгіге» үміткер
БҚО білім басқармасының басшысы Айгүл Мыңбаеваның айтуынша, соның 3171-і немесе 69,2 пайызы ҰБТ-ға қатысуға өтініш білдірді. Осылардың ішінде 239 түлек «Алтын белгіге», 114-і үздік аттестатқа үміткер. Биыл тест тапсырмаларында логикалық сипаттағы тапсырмалардың саны артады. Тест сұрақтары «Мемлекеттік құпиялар туралы» ҚР Заңына сәйкес мемлекеттік құпия болып табылады. Оны бұзғандар заң талабы бойынша жауапқа тартылады. Өткен жылдардағыдай, ҰБТ өңірде 9 тестілеу бекетінде өтеді. Олардың барлығы ұялы байланысты тұншықтыру құралдары және бейнежазу камераларымен жабдықталды. Оқушылардың ұялы телефон немесе ұстаздарының "көмегіне" алаңдамай, өз білімдеріне ғана сеніп, сынақ тапсыруы қатаң қадағаланады. Биылғы ерекшеліктің бірі, ҰБТ нәтижесінде бұрын түлектердің аты-жөні ілінсе, енді ЖСН-і ғана жазылады. Халықаралық және республикалық пәндік олимпиадалар, ғылыми жобалар, қосымша білім беру бойынша түрлі байқаулардың жеңімпаздары, Назарбаев зияткерлік мектептерінің түлектері ҰБТ-дан босатылады.
Өткен жылы облыс түлектерінің 69,84 пайызы (республикалық көрсеткіш - 64,38 пайыз) тестілеуге қатысып, олар орташа 81,52 балл (еліміз бойынша - 76,9 балл) жинады, бұл 2013 жылғыдан 3,1 балға артық болды. «Алтын белгіге» 221 үміткердің 112-сі немесе 50,68 пайызы (2013 жылы - 44,02 пайыз, республикалық көрсеткіш - 40,7 пайыз), үздік аттестаттан дәмелі 97 түлектің 27-сі немесе 27,84 пайызы өз білімдерін ақтады. Соған қоса «Алтын белгіге» үміткер 20 түлекке 1 балл жетіспеуіне байланысты оларға да үздік аттестат берілді.
Облыста білім саласында 20960 педагог жұмыс жасаса, соның 429-ы - өткен жылы келген жас мамандар. Қазіргі кезде 83 маман, әсіресе, ауылдық елді мекендердегі шағын жинақты мектептерде математика, қазақ мектебіндегі орыс тілі мен әдебиеті, физика, химия, бастауыш, тарих пәндерінің мұғалімдері жетіспейді. Осы мәселені шешу бағытында Астана, Алматы, Ақтөбе қалаларындағы ЖОО-лармен де байланыс орнатылып, ынтымақтастық туралы меморандумға қол қойылды.
Айта кетейік, облыс мектептерінде өтетін соңғы қоңырау салтанаттарына өңірдегі ақпараттық-насихат тобының мүшелері қатысып, Елбасының «Нұрлы жол» бағдарламасы мен «100 нақты қадамына» қатысты жергілікті жерде атқарылып жатқан жұмыстар мен алдағы мақсат-міндеттер жөнінде баян етеді.