ОРАЛ. ҚазАқпарат - Батыс Қазақстан облысында «Бекіре-2019» жедел алдын алу шарасы барысында 3,5 тонна балық тиелген автокөлік ұсталды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, оқиға 5 сәуір күні шамамен сағат 02.40-та Орал-Атырау жолы бойында орын алды.
Ақжайық ауданы Чапаев ауылы тұсында 1980 жылғы А. деген азамат айдап келе жатқан «ГАЗ-53» автокөлігі тоқтатылды. Оның 3,5 тоннадай қара балықты тиісті құжаттарсыз тасымалдағаны анықталды.
Ақжайық аудандық полиция бөлімі аталған дерек бойынша ҚР ҚК 196-бабы 1-бөлігіне сәйкес (көрiнеу қылмыстық жолмен табылған мүлiктi иемдену немесе өткізу) сотқа дейінгі тергеу амалдарын жүргізуде.
Балықтың қайдан алынғандығы тексерілуде.
Өңірде Жайық-Каспий бассейні аумағында 1 сәуір - 31 мамыр аралығында «Бекіре-2019» шарасы өткізілуде.
Еске сала кетейік, бұдан бұрын БҚО-да тоғанда үш тоннадан астам балықтың қырылып қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).