ОРАЛ. ҚазАқпарат - Батыс Қазақстан облысында 3126 мемлекеттік қызметші тестілеуден өтті. Бұл туралы бүгін Орталық коммуникациялар қызметі өңірлік филиалында ҚР Мемлекеттік қызмет істері және сыбайлас жемқорлыққа қарсы іс-қимыл агенттігі БҚО бойынша департаментінің басшысы Болат Исақов мәлім етті, деп хабарлайды «ҚазАқпарат» тілшісі.
Оның айтуынша, соның ішінде үшеуі ғана тапсырмаларды орындай алмаған. Мемлекеттік қызметшілерді аттестациялау 1 шілдеге дейін жалғасады, қорытындысы да сол кезде шығарылатын болады.
Биылғы 1 сәуірдегі мәлімет бойынша облыста 461 мемлекеттік орган тіркелсе, олардағы штат саны - 4444. Соның ішінде жеті адам саяси қызметші болса, «А» корпусы лауазымы - 19, «Б» корпусына жататындар - 4418.
Жыл басынан бері мемлекеттік органдар 364 бос әкімшілік мемлекеттік қызмет лауазымдарына конкурстар өткізген. Жалпы конкурс 209 бос лауазымға өткізілді. Оған қатысқан 485 үміткердің 197-сі мемлекеттік қызметке кірісуге мүмкіндік алды.
Биыл 396 мемлекеттік қызметшіні оқыту жоспарланса, қазірдің өзінде 210-ы немесе 53 пайызы оқытылды.
«Үш айда 12 тексеріс жүргізіліп, соның нәтижесінде 112 заңбұзушылық анықталды. Әдеп жөніндегі кеңестің төрт отырысы өтіп, 25 мәселе, 15 тәртіптік іс қаралды. 11 мемлекеттік қызметшіге тәртіптік жаза қолдануға ұсыныс жасалса, соның жетеуі мемлекеттік қызметке кір келтіретін тәртіптік теріс қылыққа барған, төртеуі Әдеп кодексін бұзған», деді Б.Исақов.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).