ОРАЛ. ҚазАқпарат - Батыс Қазақстан облысында бес ауданда 34 елді мекенге газ құбыры тартылады. Бұл туралы бүгін облыс әкімі Алтай Көлгінов тұрғындармен есептік кездесуінде айтты, деп хабарлайды «ҚазАқпарат» ХАА тілшісі.
Өңір басшысының сөзіне қарағанда, шалғайдағы Бөкей ордасында 11, сондай-ақ Ақжайық, Жаңақала, Жәнібек, Сырым аудандарында тағы 23 елді мекенге газ жеткізіледі.
Оған қоса облыс орталығындағы Орал жылу-қуат орталығына резервтік газ құбыры құрылысы (2 млрд. теңге) аяқталады.
«Қазіргі таңда тұрғындардың 93,6 пайыздан астамы, яғни 275 ауыл, 593 мың тұрғын «көгілдір отынмен» қамтылған. Өткен жылы Сырым, Қаратөбе, Шыңғырлау, Теректі аудандарының 17 ауылына газ құбыры тартылып, 8 мыңнан астам тұрғын от жағып, күл шығару машақатынан құтылды. Алдағы мақсат - облыс тұрғындарын газбен түгелдей қамту», деді Алтай Көлгінов.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).