АСТАНА. KAZINFORM – Батыс Қазақстан облысының Сырым ауданында ұзақ уақыт бойы пайдаланылмай келген 6 200 гектардан астам жер мемлекет меншігіне қайтарылды. Бұл туралы облыстық прокуратура хабарлады.
Сырым ауданының прокуратурасы жер заңнамасының сақталуына жүргізген талдау барысында бірқатар жер пайдаланушының өздеріне берілген учаскелерді ұзақ уақыт бойы нысаналы мақсатына сай пайдаланбағанын анықтаған.
Прокурорлық қадағалау шараларының нәтижесінде кадастрлық құны 75 млн теңгеден асатын жер учаскелері мемлекет меншігіне қайтарылды.
– Қазіргі уақытта қайтарылған жер учаскелері заңды экономикалық айналымға енгізіліп жатыр. Сонымен қатар жергілікті атқарушы органдарға Мемлекет басшысының тапсырмаларына сәйкес тиісті бағдар берілді. Атап айтқанда, қайтарылған жерлерді ауылдық жерде тұратын адал ниетті субъектілерге беру ұсынылды, – деп хабарлады Батыс Қазақстан облысының прокуратурасы.
Айта кетейік, бұған дейін Ақмола облысының Біржан сал ауданында кадастрлық құны 492,6 млн теңге болатын 121 мың гектардан астам жайылым мемлекет меншігіне қайтарылған еді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).