ОРАЛ. ҚазАқпарат – Батыс Қазақстан облысында қора-қопсыға қоса 8 тонна пішен, мал өртеніп кетті, деп хабарлайды ҚазАқпарат тілшісі.
БҚО ТЖ департаменті «Өрт сөндіру және авариялық құтқару жұмыстары қызметі» ММ мәлім еткеніндей, оқиға 7 желтоқсан күні Теректі ауданы Ақсоғым ауылында болды.
Сағат 11.37-де Жеңіс көшесіндегі жеке тұрғын үйдің ауласында орналасқан шаруашылық нысанының өртеніп жатқаны жөнінде хабар түскен.
Аумағы 40 шаршы метрді қамтыған өрттен 8 тонна пішен күлге айналды. Оған қоса 1 бас ірі қара мен бұзау, 20 үй құсы отқа оранды.
«Тілсіз жау» сағат 16.10-да оқшауланып, 17.51-де толықтай жойылды.
Қазіргі кезде өрттің шығу себебі, келтірілген шығын анықталу үстінде.
Еске сала кетейік, бұдан бұрын Батыс Қазақстанда сібір елігін атқан браконьерлер ұсталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).