ОРАЛ. ҚазАқпарат - Шыңғырлау аудандық сотында автокөлікті айдап кету дерегі бойынша аудан тұрғындарына қатысты қылмыстық іске нүкте қойылды, деп хабарлайды «ҚазАқпарат» тілшісі.
БҚО сотының баспасөз қызметінен түскен мәліметке қарағанда, сотталушылар кісі жоқтығын пайдаланып, үйдің жанында тұрған автокөлікті заңсыз иемденіп, кейін көлік руліне ие бола алмай, аударылған. Соның салдарынан автокөлік толық жарамсыз болып, жәбірленушіге 1,5 млн теңге көлемінде залал келтірілген.
Сот талқысында сотталушылар кінәсін толық мойындап, өкінетіндерін білдірді.
Сот үкімімен сотталушылар ҚР ҚК 200-бабы 3-бөлігіне сәйкес айыпты деп танылып, ҚР ҚК 55-бабы 3-бөлігі қолданылып, әрқайсысына 4 жыл бас бостандығынан айыру жазасын қауіпсіздігі орташа қылмыстық-атқару жүйесі мекемесінде өтеу белгіленді.
Жәбірленушінің пайдасына 1,5 млн теңге материалдық шығын өндірілді.
Үкім заңды күшіне енген жоқ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).