ОРАЛ. KAZINFORM — Батыс Қазақстан облысы Жаңақала ауданы Жаңақазан ауылдық округіндегі Сарыайдын көлінде қырылған балықтың шұңқырға тасталып жатқаны жөнінде бейнежазба тарады.
БҚО табиғи ресурстар және табиғат пайдалануды реттеу басқармасы басшысының орынбасары Дархан Закариннің түсіндіргеніндей, оқиға болғаннан кейін санитариялық-эпидемиологиялық станса мамандары мен ветеринарлар су мен балықтан сынама алған. Оның нәтижесі әзірге шыққан жоқ.
— Қазіргі таңда Сарыайдын көлінде тазалау жұмыстары жүргізіліп жатыр. Оқиға орнында оншақты адам 3 техникамен жұмыс істеп жатыр. Қырылған балық шұңқырға көміліп, жойылып жатыр, — деді Дархан Закарин.
Жаңақала ауданы Жаңақазан ауылдық округінің әкімі Сәкен Ғұбашев төрт күннен бері балықтың жиналып, көлдің тазаланып жатқанын жеткізді.
Еске сала кетейік, бұдан бұрын Батыс Қазақстанда Сарыайдын көлінде балық қырылып қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).