ОРАЛ. ҚазАқпарат – Батыс Қазақстан облысында бәйге аттарын ұрлағандар ұсталды, деп хабарлайды ҚазАқпарат тілшісі.
БҚО полиция департаментінің баспасөз қызметінен түскен мәліметке қарағанда, барымташылар Тасқала ауданы Айнабұлақ ауылы тұрғынының қорасынан екі бәйге жылқыны жымқырып кеткен.
Осылайша ауыл тұрғынына 2 млн 485 мың теңге залал келтірілген.
Іздестіру шаралары барысында қылмыстық топ қолға түсті.
Орал қаласының 1991 және 1995 жылғы тұрғындары ұрланған қос жылқыны көршілес Саратов облысына асырып жіберіп, сондағы таныстарында ұстаған.
Жылқылар иесіне қайтарылды.
Күдіктілерге қатысты ҚР ҚК 188-бабы 3-бөлігіне сәйкес тергеу амалдары жүргізіліп, қылмыстық іс сотқа жіберілді.
Мал иесінің айтуынша, ұрланған сәйгүліктері бұрын республикалық, облыстық, аудандық бәйгелерде жүлде алып жүрген. Қайтарылған кезде жылқылардың қоңданып қалғаны байқалған. Яғни, ұрылар оларды семіртіп, етке сатып жіберуді көздесе керек.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).