БҚО-да бір аптаның ішінде 1500-ге жуық жүргізуші шекарадан өтті
БҚО тауарлар мен көрсетілетін қызметтердің сапасы мен қауіпсіздігін бақылау департаментінің басшысы Мұхамғали Арыспаевтың облыстық жедел штаб отырысында мәлім еткеніндей, соның ішінде 1044 адамның COVID-19-ге анықтамасы болған.
Анықтамасы жоқ 114 адам екі күнге карантиндік стационарға жатқызылып, сынама алынған кезде Түркістан облысының үш азаматынан коронавирус анықталды.
Анықтамасы жоқ 19 шетелдік азамат кері қайтарылды.
Сондай-ақ осы кезеңде шекарадан 1482 жүргізуші өтті. Соның 889-ының анықтамасы болған жоқ. Солардың ішінен ресейлік 2, батысқазақстандық 6 азаматтан індет табылды. Оған қоса 2323 транзиттік жүргізушінің 19-ына кіруге рұқсат берілген жоқ.
М.Арыспаевтың сөзіне қарағанда, облыста эпидемиологиялық жағдай тұрақсыз болып отыр.
Өңірде қазан айында 161 адамның коронавирус жұқтырғаны тіркелді.
Тек соңғы аптада 71 адамнан COVID-19 анықталды. Соның ішінде 34-інен (47,9 пайызы) ауруханаға жатар алдында, 17-сінен (23,9 пайызы) қарым-қатынаста болғандарды тексерген кезде, 12-сінен (16,9 пайызы) жұмысқа бару және мемлекеттік шекарадан өту үшін профилактикалық мақсатта сынама алынған уақытта, 8-інен (11,3 пайызы) медициналық мекемеге жүгінген сәтте індет жұқтырғаны белгілі болды.
Індет жұқтырғандардың 40,8 пайызы (29 адам) – зейнеткерлер, 19,7 пайызы (14) – жұмыс істейтіндер, 14,1 пайызы (10) – жұмыссыздар, 9,9 пайызы (7) – медицина қызметкерлері, 9,9 пайызы (7) – оқушылар, 4,2 пайызы (3) – мұғалімдер, 1,4 пайызы (1) – балабақша тәрбиеленушісі.
«Облыста қазіргі таңда 7 вирусологиялық зертхана жұмыс істеуде. Қазан айы басталғаннан бері жүргізілген зерттеулер саны 31,7 пайызға көбейді. Күні бүгін облыс ПТР диагностикасы үшін 36784 зерттеуге арналған 734,7 тест-жүйесімен қамтамасыз етілген», деді М.Арыспаев.
Еске сала кетейік, бұдан бұрын БҚО-да той жасаған ауыл әкімінің қызметінен босатылатынын жазған болатынбыз.