ОРАЛ. ҚазАқпарат – Батыс Қазақстан облысында бір күнде үш адам өндірістік жарақат алып, біреуі қаза тапты, деп хабарлайды ҚазАқпарат тілшісі.
БҚО денсаулық сақтау басқармасының баспасөз қызметі мәлім еткеніндей, қайғылы оқиға кеше қалаға жақын орналасқан Теректі ауданы Тоқпай ауылында болды.
Сағат 15.52-де «Қаз-Хол» компаниясы салып жатқан тұрғын үйде тас қалаушы болып жұмыс істеген 47 жастағы ер адам құлап, басынан жарақат алған. Ол ес-түссіз күйде облыстық көпбейінді ауруханаға апара жатқан кезде жедел жәрдем көлігінде көз жұмды.
Тағы бір оқиға Орал қаласында Петровский көшесі 105-мекенжайында болды. Сағат 11.54-те 48 жастағы жұмысшы биіктігі 3 метр төбеден құлаған. Басы мен омыртқасынан жарақат алған ер адам облыстық көпбейінді аурухананың хирургиялық бөлімшесіне жеткізілді.
«Жәңгір хан» сауда үйінде бейнебақылау жүйесінде оператор болып жасайтын 29 жастағы әйел сағат 23.00-де құлап, шүйдесін соғып алған. Ол да облыстық аурухананың жарақат пунктіне жеткізілді.
Еске сала кетейік, бұдан бұрын Оралда вагоннан құлаған жұмысшы мерт болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).