БҚО-да биыл 20 денсаулық сақтау нысаны жөнделеді
16:30, 17 Ақпан 2017
ОРАЛ. ҚазАқпарат - Батыс Қазақстан облысында биыл 750,5 млн теңгеге 20 денсаулық сақтау нысаны жөнделмек, деп хабарлайды «ҚазАқпарат» ХАА тілшісі.
Облыс әкімі Алтай Көлгіновтің айтуынша, Оралда 300 төсектік қалалық көпбейінді аурухананың ашылуына байланысты облыстық клиникалық ауруханада ғимарат босады. Сол ғимарат қайта жөнделіп, қалада жетінші емхана ашылатын болады. Осыған дейін қала емханаларында электронды табло орнатылса, енді осындай жүйе Ақжайық, Бөрлі және Зеленов аудандарында енгізіледі. Оған қоса 550 млн теңгеге жедел жәрдем көліктері, 174 млн теңгеге 600 дана ұйымдастыру техникасы сатып алынбақшы.
Айта кетейік, облыста 36 денсаулық сақтау мекемесінде медициналық ақпараттық жүйелер және бірыңғай Call-центр жұмыс істей бастады. 2016 жылы денсаулық сақтау саласына 56 көлік сатып алынды.