ОРАЛ. ҚазАқпарат - Астана күніне орай Батыс Қазақстан облысы Бөкей ордасы ауданының тарихи Хан ордасы ауылында Bokei Orda Trail 2023 республикалық жүгіру марафоны мәресіне жетті, деп хабарлайды ҚазАқпарат тілшісі.
Осымен екінші рет ұйымдастырылып отырған жарысқа Маңғыстау, Ақтөбе, Атырау және Батыс Қазақстан облыстарынан 100-ден астам желаяқ қатысып, бақ сынады.
Жарыстың ашылу салтанатына қатысқан Бөкей ордасы ауданының әкімі Нұрлыбек Даумов жиналғандарды Астана күнімен құттықтап, игі тілегін білдірді.БҚО қоғамдық даму басқармасының басшысы Нұрділдә Ораз тұңғыштар мекені аталған Хан ордасына алғаш рет аяқ басып отырғанын айтып, табиғаты әсем жерде мұндай спорттық іс-шараның кең көлемде ұйымдастырылуының мәні зор екендігін жеткізді.Турнирді ұйымдастырушылардың сөзіне қарағанда, күн ыстық болғандықтан, марафон таңғы сағат 06.00-де басталып, қатысушылар 7 шақырым қашықтықты қалың құмның ішімен жүгіріп өтті.Қорытындысында ерлер арасында оралдық Қаныбек Ерсайын жеңімпаз атанса, казталовтық Баубек Ілиясов екінші, Ақжайық ауданынан келген Қуандық Төлегенов үшінші орынға ие болды.Әйелдер арасында оралдықтар Ләззат Төлепбергенова, Айман Сәрсенғалиева және Диана Әсетова үздік үштікке ілікті.
Жеңімпаз-жүлдегерлер диплом, медальдармен және ақшалай сыйлықтармен марапатталды.
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).