ОРАЛ. ҚазАқпарат - Бүгін Орал қаласында бұрқасын көтеріліп, ауа райы күрделеніп кетті, деп хабарлайды ҚазАқпарат.
Қатты желге қоса қар үздіксіз жауып тұрғандықтан, әсіресе, кейбір қаладан шығатын жолдарда ауыр жүк көліктері жүре алмай, кептелістер орын алуда. Жердің тайғақтығына байланысты бір-бірімен түйісіп қалып жатқан көліктер бар. Облыс аудандарында да күрделі жағдай қалыптасып отыр. Оңтүстік аудандарда жаңбыр үздіксіз жауғандықтан, жол езіліп кеткен.
«Қазіргі кезде ауа райына байланысты әуежай жергілікті сағат 21.00-ге дейін жабық. Сол себепті Астанадан Оралға қонуы тиіс ұшақ Ақтөбеге ұшып кетіп, қазір сонда аялдауда», деп хабарлады ҚазАқпарат тілшісіне «Орал» халықаралық әуежайынан.
Айта кетейік, кеше БҚО ТЖ департаменті өңірде күн жауын-шашынды болып, тұман, көктайғақ орын алып, оңтүстік-батыстан соққан желдің жылдамдығы секундына 15-20 метрге дейін жететіні жөнінде ескерткен болатын.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).