«ҚР Ұлттық экономика министрлігі Табиғи монополияларды реттеу және бәсекелестікті қорғау комитетінің Батыс Қазақстан облысы бойынша департаменті монополияға қарсы заңнаманы бұзу фактісі бойынша «РЦКУ-Уральск» жауапкершілігі шектеулі серіктестігіне қатысты тергеп-тексеру амалдарын аяқтады», делінген хабараламада.
Тексеруге аталған ЖШС-ның үйішілік газ қондырғыларына техникалық қызмет көрсету бағасының жоғары болуына қатысты тұрғындардың көптеген арыз-шағымдары себеп болған.
Тергеп-тексеру нәтижесінде, ҚР Кәсіпкерлік кодексінің 174-бабының 1-тармақшасына сәйкес, Қазақстанның монополияға қарсы заңнамасын бұзу фактісі анықталды. Атап айтқанда, «РЦКУ-Уральск» ЖШС үйішілік газ қондырғыларына техникалық қызмет көрсету бағасын негізсіз көтеріп, жоғары баға белгілеген.
Қазақстан Республикасының ӘҚБтК-нің 159-бабы 3-бөліміне сәйкес, үстем жағдайды асыра пайдалану, яғни монополиялық жоғары бағаларды белгiлеу, ұстап тұру фактісі бойынша әкімшілік іс қозғау туралы шешім қабылданды. Аталған факті бойынша хаттама толтырылып, сотқа жолданды.