ОРАЛ. ҚазАқпарат - Батыс Қазақстан облысында елді мекендерді газдандыруға 3,7 млрд. астам теңге бөлініп отыр. Бұл туралы бүгін Орталық коммуникациялар қызметі өңірлік филиалында облыс әкімінің орынбасары Бағдат Азбаев мәлім етті, деп хабарлайды «ҚазАқпарат» тілшісі.
Оның айтуынша, соның ішінде Сырым, Қаратөбе, Шыңғырлау аудандарын газдандыруға 750 млн. теңге қаралды. Оған қоса бес аудандағы 12,7 мың тұрғыны, 106 әлеуметтік нысаны бар 34 елді мекенге газ құбырын тартуға 2,6 млрд. теңге жұмсалмақ. Соның ішінде шалғайдағы Бөкей ордасы ауданының 11 елді мекенін газдандыруға 500 млн. теңге кетпек. Ал 2,1 млрд. теңге Орал жылу-қуат орталығына магистральды газ құбырын тарту жұмыстарын жалғастыруға бағытталды. Сондай-ақ Ақжайық, Жаңақала, Жәнібек және Сырым аудандарындағы 23 елді мекенге газ құбырын тартуға 420,7 млн. теңге берілді.
«Күні бүгін конкурстар өткізіліп, мердігерлер анықталды», деді Б.Азбаев.
Айта кетейік, қазіргі таңда облыс халқының 93,4 пайызы табиғи газбен қамтылған, соның ішінде 593 мың халқы бар 275 ауыл газдандырылған. Жыл аяғында аталмыш көрсеткіш 94 пайызға жетпекші.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).