ОРАЛ. ҚазАқпарат - Батыс Қазақстан облысында биыл Индустрияландыру картасы аясында 7,7 млрд теңгеге 7 инвестициялық жоба жүзеге асырылуда, деп хабарлайды «ҚазАқпарат» тілшісі.
Облыс әкімі Алтай Көлгіновтің айтуынша, бұл 440 жұмыс орнын ашуға мүмкіндік береді. Соның ішінде 926 млн теңгеге қосымша үш жоба іске қосылмақшы. Атап айтқанда, «Стекло Сервис» ЖШС 350 млн теңгеге алдағы желтоқсан айында терезе және есік шығару өндірісін бастамақшы. Сол секілді «Асар» ЖШС жыл соңына дейін 376 млн теңгеге аяқкиім тігу фабрикасын ашпақшы. Ал «Евразия Тренд» ЖШС 200 млн теңгеге есіктер шығаруды жолға қоймақ.
Жалпы, екінші бесжылдық (2015-2019) барысында өңірде 82,4 млрд теңгеге 22 инвестициялық жоба (1196 жұмыс орны) жүзеге асырылуда. 2018-2019 жылдары 1,6 млрд теңгеге үш жоба іске қосылмақшы.
Айта кетейік, биылғы он айда өнеркәсіп кәсіпорындары 1,5 трлн теңге өнім өндірді, бұл өткен жылғыдан 7,1 пайызға көп. Ал экспорт көлемі тоғыз айда 3,4 млрд АҚШ долларына жетіп, 41 пайызға артты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).