ОРАЛ. KAZINFORM — Батыс Қазақстан облысы Бәйтерек ауданы Петров елді мекенінде 16 отбасы тұрып жатыр.
Бәйтерек ауданының әкімі Марат Тоғжановтың мәлім еткеніндей, аталған елді мекен Январцев ауылдық округіне қарайды.
Петров ауылы мұнай мен газ өндіретін Рожковское кен орнына жақын орналасқан. Санитарлық қорғау аймағына кірмесе де, елді мекен тұрғындары қоныс аудару жөнінде өтініш білдірген. Соған сәйкес шешім қабылданған.
— Петровтағы 16 отбасының біреуі ғана көп балалы. Оларды Январцев ауылына көшіру үшін 320-330 млн теңге қажет. Шығынның бәрін есептеп, соған сәйкес қаржы көзі іздестірілетін болады, — деді М.Тоғжанов.
Аталмыш елді мекенде бастауыш мектеп жұмыс істейді.
Еске сала кетейік, бұдан бұрын БҚО-да Березов ауылы тұрғындары түгелдей көшірілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).