ОРАЛ. ҚазАқпарат – Батыс Қазақстан облысында 280 дана киік мүйізін тасымалдаған жүргізуші ұсталды, деп хабарлайды ҚазАқпарат тілшісі.
«Охотзоопром» ӨБ» РМҚК-дан алынған мәліметке қарағанда, 4 маусым күні сағат 23.30 шамасында Атырау-Орал жолының Ақжайық ауданы Чапаев ауылы тұсында «Suzuki Grand Vitara» автокөлігі тоқтатылды.
Құжаттарды тексеру кезінде күдікті көлігімен Оралға қарай қашып кеткен.
«Оқиға орнын қарау кезінде 280 дана киік мүйізі табылып, тәркіленді. Аталған дерек бойынша ҚР ҚК-нің 339-1-бабы 1-бөлігіне сәйкес қылмыстық іс қозғалды», - делінген «Охотзоопром» ақпаратында.
БҚО Полиция департаментінің ресми өкілі Болатбек Белгібековтің нақтылауынша, көлік рулінде 33 жастағы азамат болған. Ол Атырау-Орал жолының 382-шақырымында бұрылып, далалық жолға түскен. Сол жерде өзінің құжаттарын тастап кеткен.
7 маусым күні жедел іздестіру шаралары барысында полиция қызметкерлері оның жүрген орнын анықтап, қолға түсірді.
Еске сала кетейік, бұдан бұрын БҚО-да 227 дана киік мүйізін сатпақ болғандардың сотталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).