ОРАЛ. ҚазАқпарат – Батыс Қазақстан облысында коронавирус жұқтырған әйелдің біреуі Саратовтан, екіншісі Атыраудан келген. Бұл туралы облыстық денсаулық сақтау басқармасының басшысы Болатбек Қаюпов шұғыл өткізілген брифинг барысында айтты, деп хабарлайды ҚазАқпарат тілшісі.
Оның айтуынша, екеуі де – БҚО тұрғындары, олар жұқпалы аурулар ауруханасына жатқызылды.
Қазіргі кезде ауырған адамдармен байланыста болғандар анықталу үстінде.
Күні бүгін карантиндік және провизорлық стационарда барлығы 65 адам жатыр, бәрінің жағдайы қанағаттанарлық.
БҚО-ның бас мемлекеттік санитарлық дәрігері Мұхамғали Арыспаевтың сөзіне қарағанда, Ресейден келген әйел 24 наурыз күні шекарадан өткен. Содан кейін үйінде оқшауланған. Төрт-бес күннен соң аурудың алғашқы белгілері байқалғаннан кейін провизорлық госпитальға жатқызылды.
Жалпы, екеуінің де жағдайы жақсы. Аурудың осы екі ошағы бойынша карантиндік жұмыстар жүргізілуде.
БҚО әкімі Ғали Есқалиев те Фейсбуктегі өзінің парақшасында коронавирус жұқтырған екі адамның тіркелгенін хабарлап, аурудың бастапқы белгілері пайда болған кезде жедел жәрдем шақырылып, олардың оқшаулау орындарына жеткізілгенін мәлімдеді.
Өңір басшысы эпидемиологиялық және экономикалық жағдай бойынша сауалдар туындаса, WhatsApp 7 700 0 109 109 нөміріне жолдауға болатынын жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).