ОРАЛ. ҚазАқпарат – Батыс Қазақстан облысында коронавирустан емделіп шыққан бес адамның екеуі – Семей мен Тараз қаласының тұрғыны, деп хабарлайды ҚазАқпарат тілшісі.
Облыстық жұқпалы аурулар ауруханасының директоры Надия Ахметованың айтуынша, қалғандары – облыс тұрғындары, олар Орал қаласы, Тасқала мен Теректі аудандарынан.
«Бәрінің де жағдайлары қанағаттанарлық. Бақылау сынамалары олардың коронавирустан айыққандығын көрсетті. Қазіргі кезде семейлік және тараздық тұрғынның еліне немен жететіні шешілуде. Ауруханада емделіп жатқан қалған науқастар жеңіл және орташа халде», деді ҚазАқпарат тілшісіне Н.Ахметова.
Осылайша, БҚО-да емделіп шыққандар саны 41-ге жетті.
Еске сала кетейік, бұдан бұрын Батыс Қазақстан облысында тағы бес адамның емделіп, үйіне оралғанын, соңғы анықталған 4 науқастың үшеуі Ресейден келгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).