ОРАЛ. KAZINFORM — Шыңғырлау аудандық соты шаруа қожалығы басшысының материалдық шығынды өндіру туралы талап арызын ішінара қанағаттандырды.
БҚО сотының баспасөз қызметінен мәлім еткеніндей, қожалық басшысы үш тұрғынның жылқылары арпа егістігін таптағаны үшін материалдық шығынды өндіру туралы өтінішпен жүгінген.
Сотта анықталғанындай, жауапкерлер 71 жас жылқыны бақпай, соның салдарынан мал арпа егістігіне түскен. Арпа алқабының тапталу дерегі мен жауапкерлердің кінәсі іс материалдарымен расталды.
- Сот шешімімен ҚР Азаматтық кодексінің 935-бабының талаптары ескеріліп, талап қою ішінара қанағаттандырылды. Жауапкерлерден талапкер пайдасына бірлескен түрде 900 мың теңге өндірілді. Жауапкерлер сот қаулысымен келіспей, апелляциялық тәртіппен шағым түсірді. Батыс Қазақстан облыстық соты бірінші сатыдағы соттың тұжырымымен келісіп, шешімді өзгеріссіз қалдырды. Қаулы заңды күшіне енді, - деп хабарлады ведомстводан.
Еске сала кетейік, бұдан бұрын Батыс Қазақстанда 51,2 млн теңге әкімшілік актінің күші жойылғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).