БҚО-да күшті жел ғимараттар мен көпқабатты үйлердің шатырын ұшырып әкетті
ОРАЛ. KAZINFORM – Батыс Қазақстан облысында күшті жел ғимараттар мен көпқабатты үйлердің шатырын ұшырып әкетті.
БҚО ТЖ департаментінің баспасөз қызметінен мәлім еткеніндей, 7 шілде күні «Қазгидромет» РМК облыстық филиалының мәліметі бойынша желдің екпіні секундына 20 метрге дейін жетті.
«Соның салдарынан Тасқала ауданы Тасқала ауылында аудандық мемлекеттік кірістер басқармасы және аудандық электр торабы подстанциясының шатыры сыпырылып түсті. Сондай-ақ Орал қаласында Б.Жұмағалиев көшесі 15-мекенжайында үш қабатты тұрғын үй, осы көше бойында «Колесникова» ЖК пельмен цехы, Алаш көшесі 57-мекенжайда салынып жатқан үш қабатты үйдің шатыры жұлынды. Қазіргі кезде ақпарат нақтыланып, тиісті жұмыстар жүргізілуде», деп хабарлады ведомстводан.
Тұрғындардың сөзіне қарағанда, Теректі ауданы Шалқар көлі жағалауында демалып жатқандар алапат дауылға тап болды. Әп-сәтте киіз үйлерді су басып, демалып жатқандар қашып құтылған.
Еске сала кетейік, бұдан бұрын Орал қаласында шаңды дауыл соққанын жазған болатынбыз.