ОРАЛ. ҚазАқпарат – Батыс Қазақстан облысында күшті жел мектеп пен тұрғын үйлердің шатырын жұлып әкетті, деп хабарлайды ҚазАқпарат тілшісі.
БҚО ТЖ департаментінің баспасөз қызметі мәлім еткеніндей, 5 тамыз күні сағат 20.30-да Ақжайық ауданы Қурайлысай ауылдық округі Жұбан елді мекенінде күшті жел Талап мектеп-балабақша кешені шатырын (аумағы 20 шаршы метр) жұлып түсірді.
Екі қабатты ғимараттың жалпы ауданы – 3310 шаршы метр, 1981 жылы салынған мектеп 2009 жылы жөндеуден өткен.
Сол секілді 5 тамыз күні сағат 19.00-де Сырым ауданы Талдыбұлақ ауылында қатты жел салдарынан 11 тұрғын үйдің шатыры (65 шаршы метр) сыпырылып түсті.
Сондай-ақ 10 шаруашылық құрылысының шатырына ішінара нұқсан келді.
Үш электр бағаны құлап, 30 абонент (барлығы 116 абонент, соның ішінде 4 әлеуметтік мекеме) жарықсыз қалды.
Оқыс оқиғадан ешкім зардап шеккен жоқ.
Еске сала кетейік, бұдан бұрын Ақсай қаласында 20 жастағы жігіттің 8-қабаттан құлап кеткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).