ОРАЛ. KAZINFORM – БҚО қылмыстық істер жөніндегі мамандандырылған ауданаралық сотында Г-ға қатысты адам өлтіру дерегі бойыншы үкім шықты.
БҚО сотының баспасөз қызметінен мәлім еткеніндей, Ақсай қаласында аталмыш тұрғын қарындасын ұрып-соққаны үшін күйеу баласымен сөзге келіп, екі рет кеуде және мойын тұсына қасақана пышақ сұғып, өлтірген.
Мемлекеттік айыптаушы сотталушыға 11 жыл бас бостандығынан айыру жазасын тағайындауды сұрады.
Жәбірленуші тарап ең қатал жазаға кесуді өтінді.
Сотталушы өз кінәсін мойындаған жоқ.
- Алқабилер алқасының кесімімен сотталушы аса ауыр қылмысты жасағаны үшін кінәлі деп танылды. Сот заң талаптарын негізге ала отырып, ҚР ҚК 99-бабы 1-бөлігіне сәйкес 11 жыл мерзімге бас бостандығынан айыру жазасын тағайындады. Жазасын қауіпсіздігі орташа қылмыстық-атқару жүйесі мекемесінде өтеу белгіленді. Сот үкімі күшіне енді, - деп хабарлады ведомстводан.
Еске сала кетейік, бұдан бұрын БҚО-да төрт адамды өлтірген өзбекстандықтың өмір бойына бас бостандығынан айырылғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).