ОРАЛ. ҚазАқпарат – Батыс Қазақстанда «Лидер» қаржы пирамидасынан зардап шеккендер іздестірілуде, деп хабарлайды ҚазАқпарат тілшісі.
БҚО бойынша экономикалық тергеу департаменті мәлім еткеніндей, қазіргі кезде қаржылық (инвестициялық) пирамида құру дерегіне қатысты ҚР ҚК 217-бабына сәйкес қылмыстық іс тергелуде.
Аталмыш департаментке алданып қалған азаматтан арыз түскен. Ол «Лидер» жобасы бойынша инвестицияланған қаражаттың 10 күн ішінде 100 пайыз сыйақымен қайтарылатыны жөнінде WhatsApp мессенджері арқылы таралған хабарламаға сеніп қалып, 55 мың теңгесін аударып жіберген. Алайда шарт орындалмай, ақшасынан айырылған.
«Біз басқа да алданып қалған тұрғындарды іздестірудеміз. «Лидер» пирамидасынан зардап шеккендер 8-711-2-53-84-27 телефонына хабарласа алады», деп хабарлады БҚО бойынша экономикалық тергеу департаменті.
Еске сала кетейік, бұдан бұрын БҚО-да 10,4 млн астам теңгені жымқырған балабақша бухгалтері сотталғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).