ОРАЛ. ҚазАқпарат - Батыс Қазақстан облысында мал иесіне 3,650 млн теңге залал келтірген ұры ұсталды, деп хабарлайды «ҚазАқпарат» тілшісі.
БҚО ІІД баспасөз қызметінен түскен мәліметке қарағанда, тамыз айында Ақжайық аудандық ішкі істер бөліміне «Дөңгелек» шаруа қожалығының басшысы 11 асыл тұқымды бұқасының жоғалғаны жөнінде арыз түсірген.
Аталған дерек бойынша ҚР ҚК 188-бабы 3-бөлігіне сәйкес (ұрлық) қылмыстық іс қозғалды.
Жедел іздестіру жұмыстары барысында 6 қараша күні 37 жасар күдікті қолға түсті. Тергеу амалдары жалғасып, аталған іске қатысты адамдарды анықтау жұмыстары жүргізілуде.
Айта кетейік, «Дөңгелек» шаруа қожалығы қазақтың ақбас сиырын, көшім жылқысын және асыл тұқымды бұқаларды өсірумен айналысады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).