ОРАЛ. ҚазАқпарат – Батыс Қазақстан облысында мас күйінде автокөлік айдаған ҚР ТЖ министрлігі Өнеркәсіптік қауіпсіздік комитетінің БҚО бойынша департаменті басшысының орынбасары Азамат Есеновті қызметінен босату ұсынылды, деп хабарлайды ҚазАқпарат тілшісі.
А.Есеновтің тәртіптік ісі ҚР Мемлекеттік қызмет істері агенттігі БҚО-дағы әдеп кеңесінің 3 ақпан күнгі отырысында қаралды.
ҚР мемлекеттік қызметшілерінің Әдеп кодексінде белгіленген қызметтен тыс уақытта мінез-құлық стандарттарының талабын сақтамағаны, яғни көлік құралын масаң күйде басқарғаны үшін А.Есеновке мемлекеттік лауазымынан босату түріндегі тәртіптік жаза қолдану жөнінде ҚР Төтенше жағдайлар министріне ұсыныс беру туралы шешім қабылданды.
Анықталғанындай, А.Есенов Ақсай қаласындағы өнеркәсіп аймағы ауданында түнгі сағат 01.10-да автокөлікті мас күйінде айдағаны үшін полиция қызметкерлерімен ұсталған.
Медициналық куәландыру бойынша ол орта дәрежелі мас күйінде болған.
А.Есеновке қатысты ҚР Әкімшілік құқықбұзушылық кодексі 608-бабы 1-бөлігіне сәйкес хаттама толтырылып, ол 2020 жылғы 14 желтоқсанда Бөрлі аудандық сотында қаралды.
Бөрлі аудандық сотының қаулысымен А.Есенов айыпты деп танылып, 15 тәулік әкімшілік қамаққа алынып, 7 жылға көлік құралын басқару құқығынан айырылды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).