ОРАЛ. 27 мамыр. ҚазАқпарат - Соңғы қоңырау соғылған 25 мамыр күні Жаңақала ауданында Жаңақала орта мектебінің алты түлегі жол апатына ұшырады.
БҚО ІІД жол полициясы басқармасының инспекторы Динара Абдуқалықованың айтуынша, алты қыздың біреуі әкесінен Лексус RX 300 автокөлігін сұрап алып, достарымен қыдыруға шыққан. Чапаев-Жаңақала-Сайқын жолының 10-шақырымында қыз автокөлік руліне ие болмай, машина жолдан шығып кетіп, аударылған. Соның салдарынан түрлі жарақат алған алты қыз аудандық ауруханаға жатқызылды.
Жүргізуші куәлігі жоқ адамға автокөлігін бергені үшін қыздың әкесінің үстінен әкімшілік іс қозғалды.
Мұндай оқиға Жаңақала ауылында бұдан бұрын да орын алған болатын. Әкесінің машинасын айдап кеткен жасөспірім көлігімен үш бірдей қызды соғып, оның екеуі қыршын кетіп, біреуі ауыр жарақат алған еді.
Биыл жыл басынан бері өңірде 170 жол-көлік оқиғасы болып, соның салдарынан 30 адам қаза тауып, 227-сі жарақат алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).