ОРАЛ. ҚазАқпарат - Батыс Қазақстан облысында мемлекеттік қызметшілер соңғы үш жылда 48 сыйлықты уәкілетті органға тапсырған, деп хабарлайды ҚазАқпарат тілшісі.
ҚР Қаржы министрлігі Мемлекеттік мүлік және жекешелендіру комитеті Батыс Қазақстан департаментінің басшысы Ермек Сүйербаевтың айтуынша, сыйлықтың дені - кәдесыйлар, картина, мүсіншелер, алкоголь өнімдері, кәмпиттер.
Оның сөзіне қарағанда, барлық мемлекеттік қызметшілер алған сыйлықтарын жеті күн ішінде тапсыруы тиіс.
Мемлекеттік мүлік және жекешелендіру департаменті уәкілетті орган ретінде арнайы мемлекеттік қорға тапсырылған сыйлықтарды есепке алып, бағалап, сақтайды. Егер сыйлықтар жергілікті атқарушы органға тапсырылса, тізімдеме актісіне қол қойылғаннан кейін уәкілетті органға тиісті хабарлама жібереді.
«Мамандандырылған қорға тапсырылған сыйлықтар веб-портал арқылы нарықтық бағамен сатуға қойылады. Аталмыш сыйлықтарды сатудан 2,5 миллиондай теңге түскен. Тағы бір айта кететін жайт, мемлекеттік қызметші сыйлықты жоғары тұрған органның келісімімен нарықтық бағаға сатып ала алады», деді Е.Сүйербаев.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).